طاحن سنوني وأنقلب عارضي شيب
ودلّيت اقوم بموخري قبـل راسـي
خذيت من طبع النضا شمّخ النيـب
ثوران هـرش بالبـروك متواسـي
هذا طريق الحـق ماعنـه تجنيـب
مضموون لو تفنى الجبال الرواسي
قالوا لي ان الشيب مابـه عذاريـب
هرج يقولونه علـى غيـر ساسـي
الشيب لابـه لا معـزّه ولا طيـب
ألا المهونـه والتعـب والتعاسـي
صعب على راعيه بعض المواجيب
الهيّن الليّـن علـى العـود قاسـي
عقب الوناسه والطرب والتعاجيـب
يا شبت ياتيك الزمااااان انعكاسـي
يصير لك دون الوناسـه عواقيـب
آخر نهار وحـال دونـه دماسـي
تحّرم من السجّه ونـطّ المراقيـب
وتنسى طرات البال لو ماانت ناسي
الشيب يتعب شمّخ النيـب والذيـب
وحتى النبات أليا كبر قيـل عاسـي
ياشبت تجفـاك البنـي الرعابيـب
من عقب ما انت جنيه ترجع نحاسي
شي صحيح وماضي لـه تجاريـب
ولا يفيد لو تلبـس جديـد اللباسـي
العود له حشمه وقـدر وتواجيـب
بدور مضى واليـوم كنـه مداسـي
حتى من الاقـراب ياجـا تعاتيـب
تستضعفه بعض النفوس الخساسـي
الشيب ياصادك بعكـف المخاليـب
مايفارقك لو صحت تبي الخلاصي
مار يالله ياعالم خفى خافي الغيـب
عالم خفى المخفي بقلـب سياسـي
عبدك بدون عراك مالـه مقاضيـب
يامخضر بالنبـت عقـب اليباسـي
اطلبك عفوك وانت معطي المطاليب
بيوم تليـن بـه القلـوب القواسـي
ان صرت بالمظلم بشين الضنابيـب
حفر حفر عرضي وطـول قياسـي
الخميس مايو 07, 2009 7:21 pm